Oulu bismagotte bisma Jukka Keskitalo ásaha Anu Sorjosa Ohcejoga searvegotte girkohearrá virgái sotnabeaivve 24. beaivve borgemánus Ohcejoga girkus diibmu 11 álgi meassus. Dalán meassu maŋŋá lea maiddái boradeapmi buohkaide ja ávvudanboddu Ohcejoga searvegotte dálus.
– Lean duđavaš, ahte Ohcejoga smávva searvegoddi fidne dál Anu Sorjosis ođđa virgái ásahuvvon girkohearrá. Ohcejoga searvegoddi lea searvvušlaš searvegoddi, gos sámegielas lea guovddášlaš sadji. Illudan das, ahte ođđa girkohearrás lea juo dál oalle buorre giellamáhttu, nu ahte son sáhttá bálvalit maiddái sámegielat searvegotte lahtuid sin iežaset eatnigielain, bisma Jukka Keskitalo muitala.
Ávvudanmeassu doaimmaha bisma Jukka Keskitalo. Virgái ásaheamis veahkehit leanaproavás Tuomo Huusko, girku sámebarggučálli Erva Niittyvuopio, Ohcejoga searvegotte nuoraidbargi Ville Orjala, Ohcejoga searvegodderáđi lahttu Väinö Guttorm ja proavás Tarja Seppänen. Girkohearrá Anu Sorjonen sárdnida meassus. Musihkas vástida kántor Minna Jääskä. Musihkas veahkehit Heli Aikio, Jaana Laasonen ja Pekko Rauhala. Sin lassin mielde leat eará searvegotte bargit ja eaktodáhtolaččat sierra bálvalandoaimmain.
– Lean álggahan barggu geasi álggus Ohcejogas. Deike lei álki máhccat virgái válljejuvvon girkkohearrán diimmá gávcci mánotbaji sadjásaš girkohearrán doaibmama maŋŋá. Illudan das, ahte searvegotte olbmot leat váldán mu nu bures vuostái, Sorjonen muitala.
– Mii leat ráhkkanan viššalit sotnabeaivve ávvudan dilálašvuhtii ovttas bargiiguin ja eaktodáhtolaččaiguin. Bohccobierggut vurdet biergomáli vuoššama ja luopmánat leat čoggon ávvudan gáhku várás. Mii sávvat, ahte searvegotte olbmot bohtet stuorra joavkkuin girkui ja oktašas ávvudanboddui, Sorjonen joatká.
Anu Sorjonen lea álggahan barggus Ohcejoga searvegotte fásta girkohearrán virggálaččat 1.7.2025 rájes. Dan ovdal Sorjonen gearggai dikšut virggi sadjásažžan oanehaččat geassemánus ja gávcci mánotbaji jagis 2024. Sorjonen sirdašuvai Ohcejoga searvegotte girkohearrá virgái Järvenpää searvegotte searvegoddepástora virggis. Sorjonen lea viháhuvvon báhppan 6.beaivve geassemánus 2004 Espoo duopmogirkus.
Virgái ásaheami sáhttá čuovvut njuolggosáddaga bokte Ohcejoga searvegotte Facebook-siiddus.
Lassedieđut:
Girkohearrá Anu Sorjonen, anu.sorjonen@evl.fi, p. 0400 392 224
Bismma teologalaš veahkki Pekka Mustakallio, pekka.mustakallio@evl.fi, p. 040 7490 115